Elpress.az xəbər verir ki, Nazirlər Kabineti qeyri-hökumət təşkilatlarının (QHT) dövlət tərəfindən maliyyələşdirilməsinin “bir pəncərə” prinsipi əsasında həyata keçirilməsini nəzərdə tutan yeni qaydanı təsdiqləyib.
Yeni mexanizm dövlət büdcəsindən ayrılan qrantlar, subsidiyalar, dövlət sifarişləri və digər maliyyə dəstəyi formalarının vahid sistem üzərindən idarə olunmasını təmin edəcək. Qərarın əsas məqsədi bu sahədə şəffaflığın artırılması, hesabatlılığın gücləndirilməsi və maliyyələşdirmə proseslərinin elektron qaydada əlaqələndirilməsidir.Qaydaya əsasən, QHT-lərin maliyyələşdirilməsi üzrə işlər Qeyri-Hökumət Təşkilatlarına Dövlət Dəstəyi Agentliyi ilə birgə 15 dövlət qurumunun koordinasiyalı fəaliyyəti çərçivəsində həyata keçiriləcək.Yeni qaydalarda qrant məbləğləri də yenilənib. Belə ki, kiçik qrantların yuxarı həddi 30 min manat müəyyən edilib. Böyük qrantların aşağı həddi 30 min manat təşkil edir, yuxarı həddi isə hər müsabiqə üzrə ayrıca müəyyənləşdiriləcək. Səfər qrantlarının maksimum məbləği isə 15 min manat olacaq.Bundan əlavə, layihələrin qiymətləndirilməsi meyarları da sərtləşdirilib. Ekspertlər bundan sonra layihələrin dövlət siyasətinə, strateji sənədlərə və aidiyyəti qurumlarla əməkdaşlığa töhfəsini ayrıca dəyərləndirəcəklər.Yeni sistemin tətbiqinin QHT sektorunda fəaliyyətin daha səmərəli, nəticəyönümlü və sistemli təşkilinə imkan yaradacağı bildirilir.
