Azərbaycan Prezidenti İlham Əliyev və Slovakiya Prezidenti Peter Pelleqrini Ağdamın Baş Qərvənd kəndində aparılan quruculuq işləri ilə tanış olublar.
Elpress.az xəbər verir ki, Azərbaycan Prezidenti İlham Əliyev və Azərbaycanda rəsmi səfərdə olan Slovakiya Prezidenti Peter Pelleqrini iyulun 14-də Ağdam rayonunun Baş Qərvənd kəndinə səfər ediblər.Dövlət başçılarına kənddə həyata keçirilən tikinti və bərpa işləri barədə məlumat verilib. Bildirilib ki, uzun illər işğal altında qalan və 2020-ci il noyabrın 20-də azad edilən kənddə hazırda yaşayış evləri, sosial və mühəndis infrastrukturu inşa olunur.Səfər çərçivəsində prezidentlər Milan Rastislav Ştefanik adına 840 şagird yerlik Baş Qərvənd kənd tam orta məktəbinin təməlini qoyublar. Məktəbdə müasir tədris otaqları, laboratoriyalar, kitabxana, idman və akt zalları yaradılacaq, binanın enerji təminatı üçün günəş panelləri quraşdırılacaq.Qeyd olunub ki, Baş Qərvənd kəndinin tikintisində Slovakiya şirkətləri iştirak edir, məktəb binası isə Slovakiya tərəfindən Azərbaycana hədiyyə edilir.Daha sonra İlham Əliyev və Peter Pelleqrini kənddə inşa edilən nümunəvi yaşayış evində yaradılmış şəraitlə də tanış olublar.
