Azərbaycanda kitabxana fondlarının zənginləşdirilməsi məqsədilə hər il dövlət büdcəsindən yüz minlərlə manat vəsait ayrılır.
Elpress.az xəbər verir ki, bu barədə Milli Məclisin Mədəniyyət komitəsində keçirilən müzakirələr zamanı məlumat verilib.Bildirilib ki, nəşrlərin satın alınması üçün xüsusi komissiya fəaliyyət göstərir və hər il bu məqsədlə 600 min manatadək vəsait ayrılır. Ayrılan məbləğin həcmi illər üzrə dəyişə bilər və alınacaq kitablar komissiyanın qiymətləndirməsindən sonra müəyyənləşdirilir.Qeyd olunub ki, hazırda çap olunan hər kitab avtomatik şəkildə kitabxana fondlarına daxil edilmir. Aparılan təhlillər nəticəsində bəzi nəşrlərin ictimai faydalılığı və məzmun keyfiyyəti ilə bağlı suallar yarandığından seçim meyarları sərtləşdirilib.Məlumata görə, kitabxana fondlarının keyfiyyətinin yüksəldilməsi, xüsusilə elmi və elmi-kütləvi ədəbiyyatın payının artırılması əsas hədəflərdən biri kimi müəyyənləşdirilib.Həmçinin nəşriyyatlar və müəlliflər elmi yönümlü kitabların hazırlanmasına daha çox diqqət ayırmağa təşviq olunur. Bu sahədə akademik qurumlar və ali təhsil müəssisələri ilə əməkdaşlığın genişləndirilməsinin vacibliyi də vurğulanıb.
