Elpress.az xəbər verir ki, 2025-ci il avqustun 8-də Vaşinqtonda Azərbaycan Prezidenti İlham Əliyev, ABŞ Prezidenti Donald Tramp və Ermənistanın baş naziri Nikol Paşinyanın iştirakı ilə keçirilən görüş Cənubi Qafqazda sülh prosesinin mühüm mərhələlərindən biri kimi yadda qalıb.
Görüş zamanı Azərbaycan və Ermənistan arasında sülhün və dövlətlərarası münasibətlərin qurulması ilə bağlı sazişin razılaşdırılmış mətni paraflanıb. Daha sonra liderlərin iştirakı ilə Birgə Bəyannamə imzalanıb.Vaşinqtonda əldə olunan razılaşmalarda Azərbaycan və Ermənistan arasında kommunikasiyaların açılması, həmçinin Azərbaycanın əsas hissəsi ilə Naxçıvan arasında Ermənistan ərazisindən keçməklə maneəsiz bağlantının yaradılması məsələləri xüsusi yer tutub.Zirvə Azərbaycan-ABŞ münasibətlərinin gələcək inkişafı baxımından da mühüm siyasi hadisə olub. Tərəflər arasında Strateji Tərəfdaşlıq haqqında Xartiyanın hazırlanması barədə razılıq əldə edilib.
Həmçinin ABŞ tərəfindən “907-ci düzəliş”in tətbiqinin dayandırılması ilə bağlı qərar qəbul olunub.Sülh gündəliyində nəqliyyat və kommunikasiyaların açılması məsələsi də mühüm əhəmiyyət daşıyır. Bu istiqamətdə TRIPP (“Trump Route for International Peace and Prosperity”) layihəsinin gündəmə gətirilməsi Cənubi Qafqazın nəqliyyat və iqtisadi imkanlarının genişləndirilməsi baxımından diqqət çəkən addımlardan biri olub.Azərbaycan 2022-ci ildə Ermənistanla münasibətlərin normallaşdırılması üçün beş əsas prinsip irəli sürmüşdü. Bu prinsiplər dövlətlərin bir-birinin suverenliyinin və ərazi bütövlüyünün qarşılıqlı tanınmasını, ərazi iddialarından imtina edilməsini, güc tətbiqindən və hədələrdən çəkinməyi, dövlət sərhədinin delimitasiyası və demarkasiyasını, həmçinin nəqliyyat və kommunikasiyaların açılmasını nəzərdə tutur.Vaşinqton görüşü ilə Azərbaycan və Ermənistan arasında münasibətlərin normallaşdırılması istiqamətində yeni siyasi mərhələnin əsası qoyulub. Razılaşmaların regionda davamlı sülhün, sabitliyin və iqtisadi əməkdaşlığın formalaşmasına xidmət etməsi gözlənilir.
Qeyd edək ki, avqustun 8-də keçirilən Vaşinqton Zirvəsi Azərbaycan diplomatiyasının son illərdəki əsas siyasi hadisələrindən biri kimi qiymətləndirilir.
