Elpress.az xəbər verir ki, Milli Məclis 27 Sentyabr – Anım Günü ilə əlaqədar Bəyanat qəbul edib.
Bəyanatda qeyd olunub ki, 2020-ci il sentyabrın 27-də başlayan Vətən müharibəsi Azərbaycanın tarixində mühüm dönüş nöqtəsi olub. 44 günlük müharibədə Azərbaycan Ordusunun qazandığı Qələbə nəticəsində Ermənistanın uzun illər işğal altında saxladığı ərazilərin böyük hissəsi azad edilib və regionda yeni reallıqlar formalaşıb.
Sənəddə vurğulanıb ki, tarixi Zəfərin əldə olunmasında Azərbaycanın müdafiə potensialının gücləndirilməsi, müasir və peşəkar ordunun formalaşdırılması, iqtisadi imkanların artırılması və ölkənin beynəlxalq mövqelərinin möhkəmləndirilməsi istiqamətində həyata keçirilən tədbirlər mühüm rol oynayıb.
Bəyanatda Vətən müharibəsində Azərbaycan əsgər və zabitlərinin göstərdiyi qəhrəmanlıq xüsusi qeyd olunub. Bildirilib ki, torpaqların azadlığı uğrunda canından keçən şəhidlərin və sağlamlığını itirən qazilərin fədakarlığı xalqın qəhrəmanlıq tarixinin ən parlaq səhifələrindən biridir.
Milli Məclis həmçinin müharibə zamanı mülki əhalinin hədəfə alınmasını və yaşayış məntəqələrinə edilən hücumları qeyd edərək, nəticədə çoxsaylı insanın həyatını itirdiyini və yaralandığını diqqətə çatdırıb.
Bəyanatda 2023-cü il sentyabrın 19-20-də keçirilən lokal xarakterli antiterror tədbirlərinin də Azərbaycanın ərazi bütövlüyünün və suverenliyinin tam bərpasında mühüm mərhələ olduğu bildirilib.
Sənəddə 27 Sentyabr – Anım Gününün xalqın yaddaşında xüsusi yer tutduğu vurğulanıb. Qeyd edilib ki, bu gün Azərbaycanın azadlığının hansı böyük itkilər və fədakarlıqlar hesabına əldə edildiyini xatırladır.
Milli Məclis şəhid ailələrinin və qazilərin sosial müdafiəsinin, tibbi və mənzil təminatının diqqətdə saxlanıldığını da qeyd edib. Şəhidlərin xatirəsinin əbədiləşdirilməsi istiqamətində memorial komplekslərin, abidələrin və digər layihələrin həyata keçirildiyi bildirilib.
Bəyanatın sonunda şəhidlərin xatirəsinə dərin ehtiram ifadə olunub və onların qəhrəmanlığının Azərbaycan xalqının yaddaşında daim yaşayacağı vurğulanıb.
