Medianın İnkişafı Agentliyində İslam Əməkdaşlıq Təşkilatının Xəbər Agentlikləri Birliyinin baş direktoru ilə ikitərəfli görüş baş tutub.
Elpress.az-ın Qafqazinfo.az-a istinadən verdiyi məlumata əsasən, Medianın İnkişafı Agentliyində (MEDİA) beynəlxalq media əməkdaşlığının inkişafı və qlobal informasiya mühitində qarşıya çıxan yeni çağırışlar müzakirə olunub. Görüşdə MEDİA-nın İcraçı direktoru Əhməd İsmayılov və İslam Əməkdaşlıq Təşkilatının Xəbər Agentlikləri Birliyinin baş direktoru Məhəmməd Əl-Yami iştirak ediblər.Görüş zamanı Əhməd İsmayılov sürətlə dəyişən informasiya məkanında media qurumları arasında əməkdaşlığın genişləndirilməsinin vacibliyini diqqətə çatdırıb. O bildirib ki, müasir dövrdə saxta xəbərlərin və qeyri-mötəbər məlumatların yayılmasına qarşı mübarizə aparmaq üçün təcrübə mübadiləsinin gücləndirilməsi, media savadlılığının artırılması və rəqəmsal bacarıqların inkişaf etdirilməsi mühüm əhəmiyyət daşıyır.MEDİA-nın İcraçı direktoru həmçinin dezinformasiya, yanlış məlumatlandırma və nifrət nitqinin qarşısının alınması istiqamətində media təşkilatlarının birgə fəaliyyətinin vacibliyini vurğulayıb.Məhəmməd Əl-Yami isə rəqəmsal transformasiya dövründə yeni texnologiyaların, xüsusilə süni intellekt imkanlarının media sahəsində düzgün, məsuliyyətli və şəffaf şəkildə tətbiq edilməsinin önəmini qeyd edib. O bildirib ki, xəbərlərin hazırlanması, yoxlanılması və idarə olunması prosesində texnoloji yeniliklər jurnalistikanın peşəkar prinsipləri və etik normaları ilə uzlaşdırılmalıdır.Görüşdə media savadlılığının artırılması, informasiya təhlükəsizliyinin möhkəmləndirilməsi, innovativ həllərin tətbiqi və gələcək əməkdaşlıq istiqamətləri barədə geniş fikir mübadiləsi aparılıb. Tərəflər media sahəsində qarşılıqlı əlaqələrin inkişaf etdirilməsinin və beynəlxalq təcrübə mübadiləsinin davam etdirilməsinin vacibliyini vurğulayıblar.
