Elpress.az xəbər verir ki, Azərbaycan Xarici İşlər Nazirliyi (XİN) Səudiyyə Ərəbistanının Ras Tanura şəhərində baş vermiş və 14 nəfərin ölümü ilə nəticələnmiş helikopter qəzası ilə əlaqədar başsağlığı mesajı yayıb.
Nazirliyin “X” sosial şəbəkəsində paylaşdığı bəyanatda bildirilib ki, faciə nəticəsində insanların həyatını itirməsi Azərbaycanda dərin kədər hissi doğurub.
“Ras Tanurada 14 nəfərin həyatına son qoyan faciəvi helikopter qəzası bizi dərindən kədərləndirib. Həlak olanların ailələrinə, həmçinin Səudiyyə Ərəbistanı Krallığının hökumətinə və xalqına dərin hüznlə başsağlığı veririk”, – paylaşımda qeyd olunub.
Qeyd edək ki, Saudi Aramco şirkətinə məxsus helikopterin Ras Tanura şəhərində qəzaya uğraması nəticəsində azı 14 nəfər həyatını itirib. Hadisənin başvermə səbəbləri ilə bağlı araşdırma aparılır.
