Alimlər mineral xammal və sənaye tullantılarından vanadiumun çıxarılması üsullarını araşdırırlar
Elpress.az xəbər verir ki, Azərbaycan və Özbəkistan alimləri vanadium-titan tərkibli xammaldan və texnogen tullantılardan vanadiumun çıxarılması üçün yeni texnologiya hazırlayırlar.Birgə tədqiqat Azərbaycan Milli Elmlər Akademiyasının Kimya İnstitutunun həyata keçirdiyi layihələr çərçivəsində aparılır. “Vanadiumun titanmaqnetit filizi və texnogen tullantılarından çıxarılmasının kompleks emal metodlarının işlənib hazırlanması” adlı layihədə Azərbaycanın Acınohur və Özbəkistanın Təbinbulaq yataqlarından əldə olunan mineral xammal və konsentratların emalı nəzərdə tutulur.Tədqiqat zamanı maqnit separasiyası, qələvi və soda ilə emal, hidrometallurgiya və ekstraksiya üsullarının birgə tətbiqi planlaşdırılır. Həmçinin metallurgiya şlakları və sənaye tozları kimi texnogen tullantılardan qiymətli komponentlərin əldə edilməsi imkanları araşdırılacaq.Layihə çərçivəsində xammalın emal proseslərinin xüsusiyyətləri öyrəniləcək, optimal texnoloji parametrlər müəyyənləşdiriləcək və laboratoriya tədqiqatlarından yarımsənaye miqyasına keçid üçün texnoloji sxem hazırlanacaq.Gələcəkdə əldə olunacaq nəticələrin vanadium oksidi, titan oksidi və vanadium-titan əsaslı materialların istehsalında tətbiqi imkanlarının qiymətləndirilməsi planlaşdırılır. Layihənin nəticələri əsasında beynəlxalq elmi jurnallarda məqalələrin dərc edilməsi və yeni texnoloji həllərin patentləşdirilməsi də nəzərdə tutulur.
