Media eksperti Müşfiq Ələsgərli bildirib ki, MEDİA-nın keçirdiyi ictimai rəy sorğusunun nəticələri Prezident İlham Əliyevə yüksək ictimai etimadın formalaşma səbəblərini ortaya qoyur.
Elpress.az xəbər verir ki, Medianın İnkişafı Agentliyinin (MEDİA) keçirdiyi ictimai rəy sorğusunu şərh edən Mətbuat Şurası İdarə Heyətinin üzvü, media eksperti Müşfiq Ələsgərli əldə olunan nəticələrin cəmiyyətdə Prezident İlham Əliyevə yüksək etimadın mövcud olduğunu göstərdiyini bildirib.Onun sözlərinə görə, sorğuda respondentlərin 87,7 faizi Prezidentə etimad göstərdiyini, 93,6 faizi dövlət başçısının fəaliyyətini müsbət qiymətləndirdiyini, 81,9 faizi isə onu alternativsiz siyasi lider hesab etdiyini bildirib. Ekspert qeyd edib ki, bu göstəricilərin eyni vaxtda yüksək olması cəmiyyətdə formalaşmış ictimai konsensusun göstəricisi kimi qiymətləndirilə bilər.Müşfiq Ələsgərli vurğulayıb ki, vətəndaşlar Prezident İlham Əliyevin həyata keçirdiyi siyasətin mərkəzində milli maraqların dayandığını hesab edir. O bildirib ki, Azərbaycanın beynəlxalq nüfuzunun artması, enerji, nəqliyyat və logistika layihələrində fəal iştirakı, eləcə də milli maraqların qorunmasına yönəlmiş siyasət ictimai etimadı gücləndirən əsas amillərdəndir.Ekspertin fikrincə, dövlət başçısının regionlara mütəmadi səfərləri, vətəndaşlarla birbaşa ünsiyyətə üstünlük verməsi, sosial məsələlərə həssas yanaşması, həmçinin 44 günlük Vətən müharibəsində əldə olunan Zəfər və ölkədə sabit ictimai-siyasi mühitin qorunması da sorğunun nəticələrinə təsir göstərən mühüm amillər sırasında yer alır.
