Astana şəhərində Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Katibliyində Azərbaycanın sədrliyi ilə Yüksək Səviyyəli Şəxslər Komitəsinin növbəti iclası keçirilib.
Elpress.az xəbər verir ki, toplantıda Azərbaycanın “Daha güclü AQEM: rəqəmsallaşma, bağlantılar və Asiyada dayanıqlı inkişaf” devizi ilə həyata keçirdiyi sədrlik fəaliyyəti çərçivəsində üzv dövlətlər arasında etimadın möhkəmləndirilməsi və əməkdaşlığın genişləndirilməsi istiqamətində görülən işlər nəzərdən keçirilib.
İclas zamanı AQEM-in beynəlxalq təşkilata çevrilməsi prosesi, bu məqsədlə hazırlanan Nizamnamə layihəsi üzrə aparılan danışıqlar və əldə olunan irəliləyişlər barədə iştirakçılara məlumat verilib, üzv dövlətlərin mövqeləri ətrafında müzakirələr aparılıb.
Görüşdə, həmçinin cari ilin sonunda Bakıda keçiriləcək AQEM Zirvə Görüşünə hazırlıq məsələləri və sammitin yekun sənədləri ilə bağlı ilkin fikir mübadiləsi baş tutub.
Bununla yanaşı, Katibliyin strukturunun təkmilləşdirilməsi, beynəlxalq tərəfdaşlıq əlaqələrinin genişləndirilməsi, eləcə də təşkilatın müxtəlif əməkdaşlıq istiqamətləri üzrə konseptual sənədlər də müzakirə edilib.
İclasda AQEM-in institusional inkişafı, bu sahədə irəli sürülən təşəbbüslər və gələcək fəaliyyət istiqamətləri də diqqət mərkəzində olub.
