Bakı Dövlət Universitetinin H-indeksi 78-ə çatıb, elmi əsərlərə istinadlar artıb
Elpress.az xəbər verir ki, Bakı Dövlət Universitetinin (BDU) beynəlxalq elmi platformalardakı göstəricilərində son illərdə əhəmiyyətli artım qeydə alınıb. “Clarivate Analytics”in məlumatlarına əsasən, BDU-nun H-indeksi hazırda 78 təşkil edir. Müqayisə üçün, bu göstərici 2018-ci ildə 35, 2023-cü ildə isə 52 olub.Universitetin elmi fəaliyyətinin digər əsas göstəricilərindən biri olan istinadların orta sayı da yüksələrək 10,95-ə çatıb. “Web of Science” elmi bazasında yer alan nüfuzlu jurnallarda BDU-nun əməkdaşları, doktorantları və tələbələri tərəfindən ümumilikdə 5258 elmi məqalə dərc edilib.Həmin elmi əsərlərə indiyədək təxminən 58 min istinad verilib. İstinadların sayında son illərdə ardıcıl artım müşahidə olunub. Belə ki, 2023-cü ildə 29 min olan istinad sayı 2024-cü ildə 37 minə yüksəlib, hazırda isə 58 minə yaxınlaşıb.Universitetdə elmi infrastrukturun inkişafı, beynəlxalq əməkdaşlıqların genişləndirilməsi və yeni tədqiqat istiqamətlərinin yaradılması BDU-nun beynəlxalq elmi nüfuzunun artmasına təsir edən əsas amillər sırasında göstərilir.
