Xalq artisti “Nəyindən narahatsan” mahnısının sözlərini bəyəndiyini və duetə marağın bu qədər böyük olacağını gözləmədiyini deyib
Elpress.az xəbər verir ki, Xalq artisti Alim Qasımov müğənni Üzeyir Mehdizadə ilə birgə ifa etdiyi “Nəyindən narahatsan” mahnısı və duetə göstərilən münasibət barədə danışıb.Alim Qasımov bildirib ki, Üzeyir Mehdizadə mahnının musiqisini yazarkən onu düşündüyünü söyləyib. Xalq artistinin sözlərinə görə, xüsusilə mahnının sözləri onun xoşuna gəlib və buna görə layihədə iştirak etməyə razılıq verib.O, duetə reaksiyanın belə olacağını əvvəlcədən təxmin etdiyini, lakin marağın bu qədər böyük olacağını gözləmədiyini qeyd edib. Alim Qasımov tənqidlərə də münasibət bildirərək deyib ki, bunu hər kəs öz fikrinə uyğun qiymətləndirə bilər.Xalq artisti Montrö festivalında iştirakından da söz açıb. Onun fikrincə, festival yüksək səviyyədə təşkil olunub, peşəkar musiqiçilərin və böyük orkestrin iştirakı ilə maraqlı konsert proqramı təqdim edilib. O, tamaşaçıların çıxışı müsbət qarşıladığını və tədbirin enerjili keçdiyini vurğulayıb.Alim Qasımov son dövrlərdə televiziya proqramlarında əvvəlki qədər görünməməsinin səbəblərinə də toxunub. O bildirib ki, musiqiçinin əməyinə və hazırlığına uyğun dəyər verilmədiyi hallarda televiziya çıxışlarında iştirak etmək həvəsi azalır. Xalq artisti musiqiçinin səhnəyə çıxmazdan əvvəl məşq etdiyini, geyim və hazırlıq üçün vaxt sərf etdiyini, buna görə də əməyinin qarşılığını almasının vacib olduğunu qeyd edib.O, daha əvvəl rep ifaçısı ilə birlikdə hazırladığı layihəyə görə səsləndirilən tənqidlərə də münasibət bildirib. Alim Qasımov həmin əməkdaşlığın musiqiyə maraqdan yarandığını deyib və müxtəlif janrların bir araya gəlməsini normal hal hesab etdiyini vurğulayıb.Xalq artisti gələcəkdə də uyğun təkliflər gələrsə, belə layihələrdə iştirak edə biləcəyini bildirib. Onun sözlərinə görə, təqdim olunan musiqi və ideya ürəyincə olarsa, layihəyə razılıq verə bilər. Alim Qasımov həmçinin yeni təkliflərinin və öz ideyalarının olduğunu, zamanı gələndə onları tamaşaçılara təqdim edəcəyini deyib.
