Elpress.az xəbər verir ki, Bakının Bilgəh qəsəbəsində yeni incəsənət məktəbinin açılışı olub.
Açılış mərasimində Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva və qızı Arzu Əliyeva iştirak ediblər.Mədəniyyət naziri Adil Kərimli yeni incəsənət məktəbində görülən işlər və yaradılan şərait barədə məlumat verib.
Bildirilib ki, Bilgəh İncəsənət Məktəbi Bilgəh qəsəbə Mədəniyyət Evi, 27 nömrəli uşaq musiqi məktəbi və Sabunçu rayon Mərkəzləşdirilmiş Kitabxana Sisteminin 10 nömrəli kitabxana filialının fəaliyyətinin optimallaşdırılması nəticəsində yaradılıb.Qeyd olunub ki, 1987-ci ildə inşa edilmiş Bilgəh qəsəbə Mədəniyyət Evinin inzibati binası illər ərzində köhnələrək istifadəyə yararsız vəziyyətə düşüb. Bu səbəbdən Heydər Əliyev Fondu tərəfindən 220 yerlik yeni məktəb binası inşa olunub.Müasir standartlara uyğun şəkildə təchiz edilən məktəbdə musiqi, nəzəriyyə, xor, fotoqrafiya, rəssamlıq, heykəltəraşlıq və dizayn otaqları, xoreoqrafiya və akt zalları, kitabxana, qarderob və yeməkxana yaradılıb.Məktəbin həyətyanı ərazisində abadlıq və yaşıllaşdırma işləri də aparılıb.
Yeni təhsil ocağının Bilgəh sakinlərinin, xüsusilə də uşaqların yaradıcılıq imkanlarının genişləndirilməsinə mühüm töhfə verəcəyi gözlənilir.
