Elpress.az xəbər verir ki, körpü və yol ötürücülərinin texniki vəziyyətinin qiymətləndirilməsi məqsədilə avqustun 27-dən etibarən Bakının bir sıra ərazilərində mühəndis qurğularında instrumental müayinələr aparılacaq.
Azərbaycan Avtomobil Yolları Dövlət Agentliyindən verilən məlumata görə, avqustun 27-də Azadlıq və Ziya Bünyadov prospektlərinin kəsişməsində yerləşən “Karl Marks” yol ötürücüsündə müayinə keçiriləcək. Bu zaman nəqliyyat vasitələrinin hərəkəti məhdudlaşdırılmayacaq.Avqustun 27-dən 28-nə keçən gecə və 28-i səhər saatlarınadək isə “Bakıxanov”, “Papanin” və “Pirşağı” yol ötürücülərində aparılacaq müayinələrlə əlaqədar nəqliyyat vasitələrinin hərəkəti müvəqqəti məhdudlaşdırılacaq.
Qeyd edilib ki, instrumental müayinələr AAYDA-nın sifarişi əsasında Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin S.Z. Dadaşov adına Elmi-Tədqiqat və Layihə-Konstruktor İnşaat Materialları İnstitutu tərəfindən həyata keçiriləcək.AAYDA bildirib ki, müayinələrin aparılması yol ötürücülərinin istismar üçün təhlükəli olduğu anlamına gəlmir. Bu tədbirlər daşıyıcı konstruksiyaların möhkəmliyinin, yükdaşıma qabiliyyətinin və deformasiya göstəricilərinin, eləcə də vizual baxış zamanı müəyyən edilə bilməyən qüsurların xüsusi cihazlarla dəqiq qiymətləndirilməsi məqsədi daşıyır.
Agentlik sürücülərdən hərəkətin məhdudlaşdırıldığı müddətdə alternativ marşrutlardan istifadə etmələrini və aparılan işlərə anlayışla yanaşmalarını xahiş edib.
