Acarıstan Muxtar Respublikasının Mədəniyyət Nazirliyinin təşəbbüsü və dəstəyi ilə Batumi İncəsənət Muzeyində Azərbaycanın Əməkdar rəssamı Əsmər Nərimanbəyovanın yaradıcılığına həsr olunmuş “Rənglər simfoniyası” adlı fərdi sərginin açılışı keçirilib.
Elpress.az-ın Azərtac.az-a istinadən verdiyi məlumata əsasən, sərginin açılış mərasimində Acarıstanın mədəniyyət naziri Eliso Bolkvadze, nazir müavinləri Vladimir Mqaloblişvili və İrma Abuladze, Acarıstan Ali Şurasının və Batumi Şəhər Şurasının nümayəndələri, diplomatik korpusun üzvləri, incəsənət xadimləri və media nümayəndələri iştirak ediblər.Mədəniyyət naziri Eliso Bolkvadze Əsmər Nərimanbəyovanın beynəlxalq incəsənət mühitində əldə etdiyi uğurlardan danışaraq onun Azərbaycan təsviri sənətinin dünyada tanıdılmasına verdiyi töhfələri vurğulayıb və rəssama Acarıstan Mədəniyyət Nazirliyinin təşəkkürnaməsini təqdim edib.Azərbaycanın Batumidəki Baş konsulu Fuad Əzizov rəssamın çoxşaxəli yaradıcılığı barədə məlumat verərək bildirib ki, Əsmər Nərimanbəyovanın əsərləri Azərbaycanın milli-mədəni dəyərlərini və zəngin irsini beynəlxalq auditoriyaya çatdırır.Görüşlər zamanı rəssamın Azərbaycan və Fransada həyata keçirdiyi uzunmüddətli yaradıcılıq fəaliyyəti, beynəlxalq sərgilərdə iştirakı və Avropa incəsənət mühitində qazandığı nailiyyətlər müzakirə olunub.Qeyd edək ki, Tbilisi Dövlət Rəssamlıq Akademiyasının məzunu olan Əsmər Nərimanbəyova Azərbaycanın Əməkdar rəssamı, Fransa İncəsənət, Elm və Ədəbiyyat Akademiyasının medalçısı və UNESCO Assosiasiyasının üzvüdür. O, müxtəlif ölkələrdə keçirilən beynəlxalq sərgi, festival və simpoziumlarda iştirak edərək Azərbaycan təsviri sənətinin tanıdılmasına töhfə verir.
