Elpress.az xəbər verir ki, Azərbaycanın ilk qadın idman ustalarından biri, Əməkdar artist Züleyxa Hacıyeva 103 yaşında dünyasını dəyişib.
Bu barədə Azərbaycan Televiziya Verilişləri QSC-nin sədri Rövşən Məmmədov məlumat yayıb. O, Züleyxa Hacıyevanın uzun illər Azərbaycan radiosuna xidmət etdiyini və özünəməxsus səsi ilə bir neçə nəsil dinləyicinin yaddaşında iz qoyduğunu bildirib.
Qeyd edək ki, Züleyxa Hacıyeva 1941-ci ildə SSRİ idman ustası adına layiq görülüb. 1941-1948-ci illərdə doqquz dəfə Azərbaycan çempionu olub.
O, uzun illər Azərbaycan radiosunda diktor kimi fəaliyyət göstərib. “Səhər gimnastikası”, “Poeziya dəqiqələri”, “Axşamınız xeyir” və digər verilişlərin aparıcısı olub.
Züleyxa Hacıyeva həmçinin Azərbaycan Televiziyasında fəaliyyət göstərib və ölkənin radio-televiziya tarixində özünəməxsus iz qoyub.
Xidmətləri dövlət tərəfindən də yüksək qiymətləndirilib. O, 2002-ci ildə Azərbaycan Prezidentinin Fəxri Diplomu ilə təltif edilib.
Azərbaycanın ilk qadın idman ustası Züleyxa Hacıyeva vəfat edib
Aysel Əlibəyli
03 Sentyabr 2026 · 08:57
1032 baxış
