Perunun paytaxtı Lima ilə Bakı arasında mədəni əməkdaşlığın inkişafı istiqamətində yeni addım atılıb. Limanın vitse-meri Fabiola Morales və Azərbaycanın Meksika və Peru üzrə səfiri Seymur Fətəliyev iki şəhər arasında mədəni əlaqələrin genişləndirilməsi imkanlarını müzakirə ediblər.
Elpress.az-ın məlumatına əsasən, Görüş zamanı Bakı və Lima arasında mədəni tədbirlərin təşkili, müxtəlif qurumlar arasında əməkdaşlığın artırılması və təcrübə mübadiləsinin gücləndirilməsi məsələləri diqqət mərkəzində olub. Tərəflər iki paytaxt arasında dostluq münasibətlərinin daha da inkişaf etdirilməsinin və birgə layihələrin həyata keçirilməsinin vacibliyini vurğulayıblar.Razılaşmalar çərçivəsində Azərbaycanın səfiri Limadakı Metropoliten Muzeyinin “Qədim Mədəniyyətlər” salonuna ənənəvi Azərbaycan xalçasının hədiyyə edilməsini təklif edib. Azərbaycan xalçaçılıq sənətinin zəngin tarixini və milli mədəni irsini əks etdirən bu nümunənin muzeydə nümayiş etdirilməsi ölkəmizin mədəniyyətinin Peruda tanıdılmasına töhfə verəcək.Qeyd edək ki, Azərbaycan xalçaçılıq sənəti UNESCO tərəfindən Bəşəriyyətin Qeyri-Maddi Mədəni İrsi siyahısına daxil edilib. Təşəbbüs həm Limadakı muzeyin kolleksiyasının zənginləşdirilməsinə, həm də Azərbaycan ilə Peru arasında mədəni əlaqələrin daha da möhkəmlənməsinə xidmət edir.
