Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinə ayrılmış maliyyə vəsaitlərinin istifadəsi ilə bağlı yeni qaydalar rəsmi şəkildə təsdiqlənib.
Elpress.az-ın Milli.az-a istinadən verdiyi məlumata əsasən, Yeni təsdiqlənən qaydalara əsasən, Dövlət Agentliyinin tabeliyində fəaliyyət göstərən “ASAN xidmət” mərkəzlərində çalışan digər dövlət orqanlarının əməkdaşlarının mükafatlandırılması məqsədilə ayrılan vəsaitin istifadəsi, bölgüsü və ödəniş mexanizmi daha dəqiq və sistemli şəkildə tənzimlənəcək. Belə ki, “ASAN xidmət” mərkəzlərinə yönəldilən maliyyə vəsaiti hər ay Dövlət Agentliyi tərəfindən müvafiq mərkəzlərin xəzinə hesablarına köçürüləcək və bu vəsaitin bölüşdürülməsi növbəti ayın hesablanması əsasında həyata keçiriləcək.Vəsaitin əməkdaşlar arasında ədalətli bölgüsü isə aylıq əsasda aparılacaq və həm Dövlət Agentliyinin Aparatında, həm də “ASAN xidmət” mərkəzlərində fəaliyyət göstərən işçilər üçün ayrı-ayrılıqda müəyyən ediləcək. Bu proses Dövlət Agentliyinin Aparatında sədrin əmri, “ASAN xidmət” mərkəzlərində isə müvafiq mərkəz direktorunun əmri ilə təsdiqlənərək rəsmiləşdiriləcək.Yeni qaydalarda əmək məzuniyyəti dövründə mükafatlandırma mexanizmi də xüsusi olaraq tənzimlənir. Belə ki, Agentlik Aparatının əməkdaşı məzuniyyətdə olduğu müddətdə mükafatı həmin ay üzrə düşən məbləğin 50 faizi həcmində, “ASAN xidmət” mərkəzlərində çalışan əməkdaşlar isə 80 faizi həcmində alacaqlar. Digər dövlət orqanlarının əməkdaşları üçün isə mükafat məbləği “ASAN xidmət” mərkəzlərində və səyyar xidmətlərdə aparılan nəzarət və qiymətləndirmə qaydalarına uyğun olaraq müəyyən edilən aylıq yekun bal əsasında hesablanaraq ödəniləcək.
