“Azərpoçt” beynəlxalq poçt rəhbərlərini Bakıda bir araya gətirdi
Elpress.az xəbər verir ki, AZCON Holding şirkətlərindən olan “Azərpoçt” MMC 14–17 iyul 2026-cı il tarixlərində Bakıda keçirilən Ümumdünya Poçt İttifaqının (ÜPİ) Xidmət Keyfiyyəti Fondunun (QSF) İdarə Heyətinin 95-ci iclasına ev sahibliyi edir. Tədbir ÜPİ-nin Beynəlxalq Bürosu ilə əməkdaşlıq çərçivəsində təşkil olunub.Açılış mərasimində çıxış edən “Azərpoçt” MMC-nin İdarə Heyəti sədrinin vəzifəsini icra edən Manaf Babayev bildirib ki, qurum beynəlxalq əməkdaşlığın genişləndirilməsinə və Ümumdünya Poçt İttifaqının təşəbbüslərinə fəal dəstək verməyə xüsusi önəm verir.İclas çərçivəsində Xidmət Keyfiyyəti Fondunun sessiyaları keçirilərək müxtəlif layihə təklifləri, yekun və qiymətləndirmə hesabatları, eləcə də fondun gələcək fəaliyyət istiqamətləri müzakirə olunur. Bununla yanaşı, “QSF AZE2313 Bakı” layihəsi üzrə magistral poçt daşımalarının təkmilləşdirilməsi məqsədilə alınmış beş iritonnajlı nəqliyyat vasitəsinin yekun qiymətləndirilməsinin aparılması da gündəlikdə yer alır.Bildirilib ki, ÜPİ-nin Xidmət Keyfiyyəti Fondu inkişaf etməkdə olan ölkələrdə poçt xidmətlərinin modernləşdirilməsinə, infrastrukturun yenilənməsinə və xidmət keyfiyyətinin artırılmasına dəstək verən mühüm maliyyə mexanizmidir. Bu baxımdan tədbirin Bakıda keçirilməsi Azərbaycanın beynəlxalq poçt sistemində artan nüfuzunun, qlobal əməkdaşlığa verdiyi töhfənin və etibarlı tərəfdaş kimi mövqeyinin növbəti göstəricisi kimi qiymətləndirilir.
