Regional inteqrasiya dövlətlərə daha güclü əməkdaşlıq quraraq gələcək inkişaf istiqamətlərini müəyyənləşdirmək imkanı yaradır.
Dünya Bankının Yaxın Şərq, Şimali Afrika, Əfqanıstan və Pakistan üzrə Strategiya və Əməliyyatlar bölməsinin direktoru Bouseina Quermazi regional inteqrasiyanın ölkələrin iqtisadi və sosial inkişafında mühüm rol oynadığını bildirib.O, Bakıda keçirilən İslam İnkişaf Bankı (IsDB) Qrupunun 2026-cı il İllik Toplantısı çərçivəsində təşkil olunan “IsDB regionlarında regional inteqrasiyanın hərəkətverici qüvvələri” adlı panel müzakirəsində çıxışı zamanı qeyd edib ki, regional inteqrasiya yalnız fiziki infrastrukturun və bazar əlaqələrinin genişləndirilməsi ilə məhdudlaşmır. Bu proses ölkələr arasında daha sıx əməkdaşlığın qurulmasına, yeni imkanların yaradılmasına və ortaq inkişaf strategiyalarının formalaşdırılmasına xidmət edir.Bouseina Quermazinin sözlərinə görə, ölkələr qonşularını seçə bilməsələr də, qarşılıqlı əməkdaşlıq vasitəsilə öz gələcəklərini müəyyənləşdirmək imkanına malikdirlər. Regional inteqrasiya məhz bu məqsədə çatmaq üçün mühüm vasitələrdən biridir.O bildirib ki, regional əməkdaşlığın əsas istiqamətlərindən biri nəqliyyat, enerji və rəqəmsal bağlantıların gücləndirilməsidir. Xüsusilə dənizə çıxışı olmayan ölkələr üçün bu cür əlaqələrin inkişaf etdirilməsi onların beynəlxalq bazarlara çıxış imkanlarını artırır və iqtisadi imkanlarını genişləndirir.Dünya Bankının nümayəndəsi vurğulayıb ki, regional inteqrasiya ölkələrə daha əlverişli resurslara çıxış əldə etməyə, yeni iş yerlərinin yaranmasına və davamlı iqtisadi artımın təmin olunmasına şərait yaradır. Bununla yanaşı, bu proses yalnız infrastruktur layihələrindən ibarət deyil, həmçinin bazarların, xidmətlərin və insanların sərbəst hərəkət imkanlarının daha səmərəli şəkildə əlaqələndirilməsini nəzərdə tutur.Onun sözlərinə görə, iqlim dəyişiklikləri, pandemiyalar və digər qlobal problemlər tək bir ölkənin səyləri ilə tam həll edilə bilməz. Bu səbəbdən regional əməkdaşlıq və birgə fəaliyyət müasir dövrdə qarşıya çıxan transmilli çağırışların aradan qaldırılması üçün əsas amillərdən biri hesab olunur.
