Məsafədən kreditlərə nəzarət güclənir: Yeni qaydalar vətəndaşların maliyyə təhlükəsizliyini artıracaq
Elpress.az-ın Milli.az-a istinadən verdiyi məlumata əsasən, Azərbaycanda kredit xidmətlərindən istifadə zamanı təhlükəsizliyin artırılması və istehlakçı hüquqlarının daha yaxşı qorunması məqsədilə yeni qaydalar tətbiq ediləcək.Azərbaycan Mərkəzi Bankı kredit risklərinin idarə olunması qaydalarına dəyişiklik edib. Yeni tənzimləmələr məsafədən göstərilən maliyyə xidmətləri zamanı yarana biləcək risklərin azaldılması, vətəndaşların hüquqlarının müdafiəsinin gücləndirilməsi və kredit əməliyyatlarında daha etibarlı mexanizmlərin yaradılmasına yönəlib.Deputat Vüqar Bayramovun sözlərinə görə, dəyişikliklər bu ilin oktyabrından qüvvəyə minəcək. Yeni qaydalara əsasən, vətəndaşlara məsafədən istehlak krediti müqavilələrinin bağlanmasına və kredit limitlərinin artırılmasına qarşı könüllü məhdudiyyət tətbiq etmək imkanı veriləcək.Belə ki, vətəndaşlar Azərbaycan Kredit Bürosu vasitəsilə müraciət edərək bütün kredit təşkilatlarında məsafədən kredit rəsmiləşdirilməsinə qadağa qoya biləcəklər. Həmçinin müştərilər yalnız xidmət aldıqları konkret kredit təşkilatına müraciət etməklə həmin qurum üzrə məhdudiyyət tətbiq edə biləcəklər.Yeni tələblərə görə, kredit təşkilatları məsafədən kredit verməzdən əvvəl bu məhdudiyyətləri yoxlamalı və yalnız qadağa olmadığı halda maliyyə vəsaitlərini təqdim etməlidirlər.Qaydalarla yanaşı, məsafədən bağlanan istehlak kreditləri üzrə vəsaitlərin hesaba köçürülməsində gözləmə müddəti də müəyyənləşdirilib. Kredit məbləği minimum əmək haqqının iki mislinədək olduqda pul vəsaiti 2 saatdan sonra, bu həddi keçdikdə isə 24 saat sonra hesaba yatırılacaq.Ekspertlər hesab edir ki, bu dəyişikliklər kiberdələduzluq hallarının qarşısının alınmasına və vətəndaşların maliyyə təhlükəsizliyinin artırılmasına kömək edə bilər. Bununla yanaşı, maliyyə savadlılığının artırılması və təhlükəsizlik sistemlərinin daha da gücləndirilməsi vacib istiqamətlərdən biri olaraq qalır.Yeni qaydaların tətbiqi ilə məsafədən kreditləşmə prosesində daha ciddi nəzarət mexanizmlərinin formalaşması gözlənilir.
