Füzulidə istifadəyə yararsız 120 kiloqram ət dövriyyədən çıxarılıb
Füzuli rayonu ərazisində aparılan nəzarət tədbirləri zamanı mənşəyi və keyfiyyəti şübhə doğuran külli miqdarda ət məhsulu aşkarlanıb.
Elpress.az xəbər verir ki, yoxlama Azərbaycan Qida Təhlükəsizliyi Agentliyinin Qarabağ regional bölməsinin əməkdaşları və polis əməkdaşlarının iştirakı ilə Alxanlı postunda həyata keçirilib.Nəzarət tədbiri çərçivəsində saxlanılan yük avtomobilinə baxış zamanı təxminən 120 kiloqram iribuynuzlu heyvana məxsus ət məhsulu müəyyən olunub. Müayinələr zamanı məhsulun istehlak üçün uyğun olmadığı üzə çıxıb.Araşdırma zamanı ətin sanitar-gigiyenik normalara uyğun şəraitdə saxlanılmadığı, daşınma qaydalarının pozulduğu və baytarlıq nəzarətindən keçmədiyi məlum olub. Məhsulun xarici görünüşündə və qoxusunda da ciddi dəyişikliklər qeydə alınıb.Avtomobilin sahibi izahatında heyvanın tələf olduğunu, sonradan kəsilərək başqa rayona aparılmasının nəzərdə tutulduğunu bildirib.Aşkarlanan məhsullar müvafiq qaydada götürülərək xüsusi saxlanc yerinə yerləşdirilib, laborator ekspertiza üçün nümunələr ayrılıb. Hadisə ilə bağlı araşdırma tədbirləri davam etdirilir.
