Beynəlxalq Enerji Agentliyinin icraçı direktoru Fatih Birol İran–ABŞ sülh prosesi və qlobal enerji bazarındakı vəziyyətlə bağlı neft qiymətlərinin gələcək dinamikasına dair açıqlama verib.
Beynəlxalq Enerji Agentliyinin (IEA) icraçı direktoru Fatih Birol bildirib ki, İran–ABŞ sülh prosesinin davam etməsi və Hörmüz boğazında sabitliyin təmin olunması neft bazarında qiymətlərin enməsinə səbəb ola bilər. Onun sözlərinə görə, hazırda 60 günlük danışıqlar dövrü müşahidə olunur və bu prosesin nəticələri enerji bazarının gələcək istiqamətini müəyyən edəcək.Birol qeyd edib ki, əgər Hörmüz boğazı tam açılaraq əvvəlki vəziyyətə qayıdarsa, neft qiymətlərində aşağı təzyiq yarana bilər. O, həmçinin tələbatın zəifləməsi və istehsalın artması ehtimalının da bazara təsir edəcəyini vurğulayıb. Bununla belə, vəziyyətin uzanması dünya iqtisadiyyatı üçün ciddi çətinliklər yarada bilər, çünki neft ehtiyatları azalır və yay mövsümündə tələbat daha da artır.IEA rəhbəri bildirib ki, müharibə və gərginliklər nəticəsində bir sıra enerji obyektləri və infrastruktur zərər görsə də, bu ziyanın bir hissəsi qısa müddətdə bərpa oluna bilər. Lakin bəzi regionlarda bərpa prosesi daha uzun vaxt tələb edəcək.Fatih Birol əlavə edib ki, dünyada bərpaolunan enerji investisiyaları sürətlə artır və 2025-ci ildə yeni elektrik stansiyalarının böyük əksəriyyəti məhz bu sahəyə aid olacaq. Onun sözlərinə görə, bu tendensiya daha çox ekoloji deyil, iqtisadi səbəblərlə bağlıdır və ölkələr üçün enerji təhlükəsizliyinin əhəmiyyətini daha da artırır.
