Azərbaycan millisinin sabiq baş məşqçisi Şahin Diniyev “Qarabağ”ın UEFA Avropa Liqasında İslandiyanın “Vestri” klubuna qarşı keçiriləcək oyunda aşkar favorit olduğunu bildirib.
Elpress.az xəbər verir ki, Şahin Diniyev “Qarabağ”ın UEFA Avropa Liqasının I təsnifat mərhələsində “Vestri” ilə keçirəcəyi qarşılaşmanı dəyərləndirərək Ağdam təmsilçisinin həm heyət, həm də oyun keyfiyyəti baxımından rəqibini üstələdiyini deyib. Onun sözlərinə görə, bu görüş “Qarabağ” üçün bəlkə də avrokuboklardakı ən rahat matçlardan biri olacaq.Təcrübəli mütəxəssis hesab edir ki, “Qarabağ” ilk oyunda cütün taleyini böyük ölçüdə həll edə bilər. O vurğulayıb ki, İslandiya təmsilçisi ölkəsinin aparıcı komandalarından sayılmır və bu baxımdan Azərbaycan çempionu rəqibindən bir neçə addım öndədir.Diniyev əlavə edib ki, komandanın yeganə çətinliyi yeni transferlərin kollektivə tam uyğunlaşmaması ola bilər. Bunun müəyyən vaxt tələb etdiyini qeyd edən mütəxəssis bu amilin də “Qarabağ”ın üstünlüyünə ciddi təsir göstərməyəcəyini bildirib.Qeyd edək ki, Qarabağ FK ilə Vestri arasında keçiriləcək görüş Bakıdakı Tofiq Bəhramov adına Respublika Stadionunda saat 20:00-da başlayacaq. Oyunu moldovalı baş hakim Roman Jitari idarə edəcək.
