Milli Məclisin komissiya sədri Ramid Namazov bildirib ki, Azərbaycanda yaradılan milli super kompüter mərkəzi həssas məlumatların ölkə sərhədlərini tərk etmədən emal edilməsinə imkan yaradır.
Elpress.az xəbər verir ki, Ramid Namazov bu fikirləri Milli Məclisin Xarici müdaxilələrə və hibrid təhdidlərə qarşı müvəqqəti komissiyasının “Rəqəmsal inkişaf, süni intellekt və uşaqların sosial şəbəkə platformalarındakı zərərli təsirlərdən qorunması” mövzusunda keçirilən ictimai müzakirələr zamanı səsləndirib.Onun sözlərinə görə, ölkədə milli super kompüter mərkəzinin yaradılması mürəkkəb süni intellekt modellərinin xarici platformalardan asılı olmadan təhlükəsiz şəkildə idarə edilməsinə şərait yaradır. Komissiya sədri vurğulayıb ki, bu addım milli təhlükəsizliyin və rəqəmsal suverenliyin gücləndirilməsi baxımından strateji əhəmiyyət daşıyır. Beləliklə, dövlətə məxsus həssas məlumatlar artıq ölkə hüdudlarından kənara çıxmadan emal oluna bilir.Ramid Namazov əlavə edib ki, 2026–2028-ci illəri əhatə edən fəaliyyət planına uyğun olaraq qadağan edilmiş məzmunun süni intellekt vasitəsilə avtomatik aşkarlanması da nəzərdə tutulur. O bildirib ki, növbəti mərhələdə, 2028-ci ilin sonunadək Azərbaycan dili üzrə böyük dil modellərinin hazırlanması planlaşdırılır. Bu təşəbbüsün məqsədi Azərbaycan dilində daha keyfiyyətli süni intellekt həllərinin yaradılması, eləcə də ölkənin mədəni və linqvistik suverenliyinin daha da möhkəmləndirilməsidir.
