Minifutbol üzrə Avropa çempionatında növbəti qələbə ilə vətənə dönən milli komandamızın üzvləri sponsorları ilə birlikdə “Abşeron” Ticarət Mərkəzinin qonağı olublar.
İkiqat qitə çempionu olan milli komandamız “Abşeron” Ticarət Mərkəzində səmimi və qürurverici bir qarşılanma ilə qəbul olunub. Komanda üzvləri səhər saatlarında mərkəzin direktoru Araz Rəhimov tərəfindən xüsusi təşkil edilmiş səhər yeməyində qarşılanaraq səmimi söhbət mühitində təbrik ediliblər. Direktor idmançılarımızı qazandıqları parlaq qələbəyə görə ürəkdən təbrik edib, onlara gələcək yarışlarda da uğurlar arzulayıb və bu nailiyyətin ölkə idmanı üçün böyük dəyər daşıdığını vurğulayıb.Daha sonra tədbir azarkeşlərlə görüş formatında davam edib. Futbolçular fanatlarla bir araya gələrək xüsusi hazırlanmış milli komanda formalarını imzalayıblar, onlara xoş xatirə üçün avtoqraflar veriblər və səmimi söhbətlər ediblər. Azarkeşlər isə çempionlarla şəkil çəkdirmək, onların uğur hekayələrini dinləmək və bu tarixi anı yaxından yaşamaq imkanı əldə ediblər.Qeyd edək ki, “Abşeron” Ticarət Mərkəzi minifutbol üzrə Azərbaycan milli komandasının əsas sponsorlarından biri olaraq qalır və ölkəmizə böyük sevinc yaşadan idmançılara dəstəyini ardıcıl şəkildə davam etdirir.
