AFFA-nın baş katibi Cahangir Fərəcullayev başda olmaqla nümayəndə heyəti Azərbaycan Respublikasının İnsan Hüquqları üzrə Müvəkkili Səbinə Əliyeva ilə görüş keçirib.
Elpress.az-ın məlumatına əsasən, Azərbaycan Respublikasının İnsan Hüquqları üzrə Müvəkkili Səbinə Əliyeva insan hüquq və azadlıqlarının qorunması istiqamətində görülən işlər barədə geniş məlumat təqdim edib. O bildirib ki, hər il ənənəvi olaraq 18 may – 18 iyun tarixləri ölkədə “İnsan Hüquqları Aylığı” kimi qeyd olunur və bu müddətdə müxtəlif hüquqi maarifləndirmə tədbirləri keçirilir.Səbinə Əliyeva uşaqlar və gənclərin sağlam fiziki inkişafının təmin edilməsinin vacibliyini vurğulayaraq, onların idmana, xüsusilə futbola marağının artırılmasının əhəmiyyətini diqqətə çatdırıb.AFFA-nın baş katibi Cahangir Fərəcullayev isə qurumun fəaliyyəti, ölkədə futbolun inkişafı üçün icra olunan layihələr və qazanılan uğurlar barədə məlumat verib.Görüş zamanı Ombudsman təsisatı ilə AFFA arasında əməkdaşlıq çərçivəsində həyata keçirilən işlərə toxunulub, həmçinin gələcəkdə reallaşdırılması planlaşdırılan birgə layihə və təşəbbüslər ətrafında fikir mübadiləsi aparılıb.
