Beynəlxalq orqan alveri ilə bağlı uzun illərdir müzakirə olunan cinayət işi yenidən diqqət mərkəzinə gəlib.
Moskva məhkəməsində davam edən proses çərçivəsində müxtəlif ölkələrdə fəaliyyət göstərdiyi iddia olunan şəbəkənin əlaqələri araşdırılır.
Elpress.az xəbər verir ki, istintaq materiallarında adı hallanan şəxslərdən biri Türkiyə vətəndaşı, transplantoloq Yusuf Sönməzdir. İddialara görə, o, vaxtilə Azərbaycanda fəaliyyət göstərən “Nur” klinikasında qanunsuz transplantasiya əməliyyatlarında iştirak edib.İş üzrə digər əsas fiqurlardan olan İsrail vətəndaşı Moşe Harel donorlarla xəstələr arasında əlaqələrin qurulmasında iştirak etməkdə, Boris Volfman isə beynəlxalq şəbəkənin təşkilati fəaliyyətində rol almaqda şübhəli bilinir.
Məlumata əsasən, Rusiya İstintaq Komitəsi bir neçə Rusiya vətəndaşını zərərçəkmiş şəxs kimi tanıyıb. İddia olunur ki, onlar sosial vəziyyətlərindən istifadə edilərək donor kimi bu prosesə cəlb olunublar.İstintaqın diqqət mərkəzində Kosovo, Türkiyə, İsrail, Rusiya və digər ölkələri əhatə edən mümkün əlaqələr dayanır. Məhkəmə prosesində yeni ifadələrin, maliyyə əlaqələrinin və digər şəxslərlə bağlı məlumatların üzə çıxacağı istisna edilmir.
Qeyd edək ki, hazırda səsləndirilən məlumatlar istintaq materiallarına əsaslanır və məhkəmə araşdırması davam edir.
Məhkəmənin yekun qərarı açıqlanana qədər təqsirləndirilən şəxslərin hüquqi statusu barədə qəti nəticə yoxdur.
