Daxili işlər naziri Sumqayıtda 585 vətəndaşın müraciətini dinləyib
Elpress.az xəbər verir ki, Daxili işlər naziri, general-polkovnik Vilayət Eyvazov Sumqayıt şəhərində vətəndaşlarla görüş keçirib, həmçinin polis və daxili qoşunlarda xidmət etmək istəyən gənclərin sıra baxışında iştirak edib. Görüş Prezident İlham Əliyevin tapşırığı və bölgələr üzrə vətəndaş qəbulu qrafikinə uyğun olaraq avqustun 31-i və sentyabrın 1-də təşkil olunub.Səfər zamanı nazir əvvəlcə Sumqayıtda Heydər Əliyevin abidəsini ziyarət edib və Ulu Öndərin xatirəsini ehtiramla yad edib.Daha sonra Sumqayıt Şəhər Polis İdarəsində vətəndaşların qəbulu keçirilib. Görüş zamanı 585 nəfərin müxtəlif məsələlərlə bağlı müraciətləri dinlənilib. Vətəndaşların problemlərinin qanunvericiliyin tələblərinə uyğun və operativ şəkildə həlli üçün aidiyyəti struktur rəhbərlərinə müvafiq tapşırıqlar verilib. Müraciətlərin əksəriyyəti yerindəcə həll olunub, araşdırılması tələb olunan məsələlər isə nəzarətə götürülüb.Vilayət Eyvazovun Sumqayıta səfəri çərçivəsində polis və daxili qoşunlarda xidmət etmək istəyən gənclər üçün sıra baxışı da keçirilib. Xidmətə qəbul tələblərinə cavab verən 458 namizəd seçim prosesinin növbəti mərhələsinə keçib.
