Elpress.az xəbər verir ki, 26 İyun – Silahlı Qüvvələr Günü və Azərbaycan Ordusunun yaradılmasının 108-ci ildönümü münasibətilə Bakının Fəvvarələr meydanında təntənəli konsert proqramı təşkil olunub.
Tədbirdə Milli Müdafiə Universitetinin tabeliyində fəaliyyət göstərən Heydər Əliyev adına Hərbi İnstitutun və Türkiyə Silahlı Qüvvələrinin Armoni orkestrləri çıxış ediblər.
Konsert proqramı ümummilli liderlər Heydər Əliyev və Mustafa Kamal Atatürkün, həmçinin Azərbaycan və Türkiyənin müstəqilliyi və ərazi bütövlüyü uğrunda canlarından keçən şəhidlərin xatirəsinin bir dəqiqəlik sükutla yad edilməsi ilə başlayıb.
Daha sonra hərbi orkestrlərin ifasında Azərbaycan Respublikasının Dövlət Himni və Türkiyə Respublikasının İstiqlal Marşı səsləndirilib.
Bayram proqramında hərbi-vətənpərvərlik mahnıları, müxtəlif marşlar, eləcə də Azərbaycan, Türkiyə və dünya bəstəkarlarının əsərləri təqdim olunub. Musiqi nömrələri paytaxt sakinləri və şəhər qonaqları tərəfindən böyük maraq və alqışlarla qarşılanıb.
