Fövqəladə Hallar Nazirliyi (FHN) çimərlik üçün nəzərdə tutulmayan su hövzələrindən istifadə ilə bağlı əhaliyə növbəti dəfə müraciət edib.
Nazirlikdən bildirilib ki, aparılan maarifləndirmə tədbirlərinə baxmayaraq, bəzi vətəndaşlar, xüsusilə uşaq və yeniyetmələr kanal, çay, arx, süni göl və digər təhlükəli su hövzələrindən çimərlik məqsədilə istifadə etməyə davam edirlər.FHN-in məlumatına görə, iyunun 1-dən bu günədək qeyri-çimərlik ərazilərdə 12 nəfərin bataraq həyatını itirməsi qeydə alınıb.Qeyd olunub ki, belə su hövzələrində sualtı relyefin təhlükəli olması, güclü axınların mövcudluğu, dərinliyin qeyri-müəyyənliyi və digər amillər insanların həyatı üçün ciddi risk yaradır.Nazirlik bir daha vətəndaşlara, xüsusilə valideynlərə müraciət edərək, uşaqları nəzarətsiz buraxmamağa, təhlükəsizlik qaydalarına əməl etməyə və çimərlik kimi nəzərdə tutulmayan sulardan istifadə etməməyə çağırıb.
