Türkiyənin aparıcı televiziya kanalları, xəbər portalları, informasiya agentlikləri və çap mediası Bakıda keçirilən Ümumdünya Şəhərsalma Forumu (WUF13) barədə geniş reportajlar yayımlayıb. Materiallarda forumun beynəlxalq əhəmiyyəti və qlobal şəhərsalma siyasətinin müzakirəsi üçün mühüm platforma olduğu vurğulanıb.
Türkiyə mediasında yayılan xəbərlərdə bildirilib ki, UN-Habitat tərəfindən təşkil olunan tədbirə 182 ölkədən 42 mindən artıq iştirakçı qatılıb və Bakı şəhəri urbanizasiya, dayanıqlı inkişaf və gələcəyin şəhərləri ilə bağlı mühüm müzakirələrin mərkəzinə çevrilib.
Yazılarda Azərbaycanın Dövlət Şəhərsalma və Arxitektura Komitəsinin sədri Anar Quliyev forumun məqsədlərinin həyata keçirilməsinə Azərbaycanın töhfə verməyə hazır olduğunu bildirib. Onun fikirlərinə əsasən, tədbir beynəlxalq əməkdaşlığın genişləndirilməsi baxımından mühüm əhəmiyyət daşıyır.
Media materiallarında qeyd olunub ki, forum Azərbaycanın işğaldan azad edilmiş ərazilərində həyata keçirdiyi “ağıllı şəhər” və “ağıllı kənd” layihələrinin beynəlxalq ictimaiyyətə təqdim olunması üçün əlverişli imkan yaradır. Bu təşəbbüslərin müasir şəhərsalma yanaşmalarına nümunə olduğu diqqətə çatdırılıb.
Türkiyə mətbuatı həmçinin vurğulayıb ki, WUF13 Azərbaycanın böyükmiqyaslı beynəlxalq tədbirləri yüksək səviyyədə təşkil etmək bacarığını bir daha nümayiş etdirir. Xəbərlərdə iki il əvvəl Bakıda keçirilən COP29 iqlim konfransının uğurla təşkil olunması da xatırladılıb.
