Ukrayna əsilli videoblogger Mixail Polyakov Hind okeanında yerləşən və xarici dünya ilə əlaqəsi olmayan qəbilənin yaşadığı Şimali Sentinel adasına qanunsuz daxil olub.
Elpress.az xəbər verir ki, hadisə 2025-ci ilin mart ayında baş verib.Məlumata görə, blogger Benqal körfəzində yerləşən və Hindistanın Andaman arxipelaqına daxil olan, ciddi qorunan və girişin qadağan edildiyi Şimali Sentinel adasına motorlu qayıqla yaxınlaşıb. Ərazi yerli hakimiyyət tərəfindən tam izolyasiya olunaraq, burada yaşayan sentinelli qəbiləsinin xarici təsirlərdən qorunması üçün xüsusi nəzarətə götürülüb.Polyakov açıqlamasında bütün riskləri bildiyini, lakin buna baxmayaraq qadağan olunmuş əraziyə daxil olmağa qərar verdiyini bildirib. O, sahilə çatmaq üçün təxminən doqquz saatlıq yol qət edib, daha sonra bir müddət ərazini müşahidə edib.Blogger sahilə qısa müddət ayaq basaraq yerli qəbilənin diqqətini çəkməyə çalışıb. O, diqqət cəlb etmək üçün fit çalıb və işıq siqnallarından istifadə edib, lakin qəbilə üzvləri ilə əlaqə qurmaq mümkün olmayıb.Sahili tərk edərkən o, yerli qəbilə üçün qazlı içki şüşəsi qoyub. Daha sonra bölgəni tərk edərkən Hindistan hüquq-mühafizə orqanları tərəfindən saxlanılıb və həbs edilib.Məhkəmə bloggerə təxminən 270 manat məbləğində cərimə tətbiq edib, o isə üç həftə nəzarətdə saxlanılıb.Polyakov sonradan bu səfərə aid görüntüləri sosial şəbəkələrdə paylaşaraq fəaliyyətinin sənədli xarakter daşıdığını iddia edib və gələcəkdə də oxşar ekspedisiyalar planlaşdırdığını bildirib.
