Bakıda nəqliyyatın təşkili ilə bağlı yeni dəyişikliklər ediləcək. “28 May” və “Nizami” metro stansiyaları arasında qatarların hərəkəti avqustun 15-dən etibarən müvəqqəti dayandırılacaq.
Elpress.az xəbər verir ki, bu müddətdə sərnişinlərin daşınmasının təmin edilməsi məqsədilə yeni ekspres avtobus marşrutlarının fəaliyyətə başlaması nəzərdə tutulur.
Belə ki, avqustun 14-dən etibarən 6 yeni ekspres marşrut sərnişinlərin istifadəsinə veriləcək.Yeni ekspres marşrutlar aşağıdakılardır:
🔹 M1 – “Elmlər Akademiyası” və “28 May” metro stansiyaları arasında;
🔹 M2 – “İnşaatçılar”, “Nizami” və “28 May” metro stansiyaları arasında;
🔹 M3 – “20 Yanvar”, “Nizami” və “28 May” metro stansiyaları arasında;
🔹 M4 – “20 Yanvar” və “Koroğlu” metro stansiyaları arasında;
🔹 M5 – “20 Yanvar” və “Gənclik” metro stansiyaları arasında;
🔹 M6 – “Elmlər Akademiyası” və “Gənclik” metro stansiyaları arasında fəaliyyət göstərəcək.
Bununla yanaşı, sərnişin tələbatının qarşılanması üçün 20 müntəzəm marşrut üzrə avtobusların sayı artırılacaq.
Sayı artırılacaq avtobus marşrutları:2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165, 199 və 202. Həmçinin “28 May” Nəqliyyat Mübadilə Mərkəzinə daxil olan bəzi marşrutların son dayanacaq məntəqələrində də dəyişiklik edilib.
Belə ki, 32 və 49 nömrəli avtobus marşrutlarının son dayanacağı Dilara Əliyeva küçəsində, 120E və 125 nömrəli marşrutların son dayanacağı isə Puşkin küçəsində müəyyənləşdirilib. Həmin dayanacaqlar Səməd Vurğun bağının ətrafında təşkil olunub.
Yeni dəyişikliklərin əsas məqsədi metroda aparılacaq işlər müddətində sərnişinlərin alternativ nəqliyyat vasitələri ilə rahat və fasiləsiz daşınmasını təmin etməkdir.
Sərnişinlərə səfərlərini əvvəlcədən planlaşdırmaları və yeni ekspres marşrutlardan, eləcə də gücləndiriləcək müntəzəm avtobus xətlərindən istifadə etmələri tövsiyə olunur.
