Ukraynadan Azərbaycana gətirilmiş daha 30 uşaq sosial reabilitasiya xidmətləri ilə təmin olunub.
Elpress.az APA-ya istinadən xəbər verir ki, Əmək və Əhalinin Sosial Müdafiəsi Nazirliyinin məlumatına görə, uşaqlar ilkin olaraq Dövlət Tibbi-Sosial Ekspertiza və Reabilitasiya Agentliyinin Qəbələ Uşaq Reabilitasiya Mərkəzində tibbi müayinədən keçirilib. Müayinələrin nəticələrinə uyğun olaraq hər bir uşaq üçün ayrıca reabilitasiya planı hazırlanıb.Proqram çərçivəsində onların psixoloji vəziyyətinin yaxşılaşdırılması və sosial adaptasiyasına dəstək məqsədilə fərdi görüşlər, qrup terapiyaları, yoqa və rəqs məşğələləri təşkil olunur. Bununla yanaşı, müalicəvi masaj, hovuz prosedurları, vannalar və art-terapiya xidmətləri də göstərilir.Nazirlikdən bildirilib ki, 10 günlük sosial reabilitasiya proqramına uşaqların asudə vaxtının səmərəli təşkili də daxildir. Bu məqsədlə onlar üçün tarixi məkanlara və muzeylərə ekskursiyalar, müxtəlif intellektual oyunlar, əyləncəli yarışlar və digər tədbirlər keçiriləcək.
