TƏBİB sistemində çalışan 72 mindən çox tibb işçisinin maaşı artırılır

Elpress.az xəbər verir ki, TƏBİB-in tabeliyində fəaliyyət göstərən tibb müəssisələrində çalışan işçilərin əməkhaqlarında artım olacaq.
TƏBİB-in İcraçı direktoru Anar Bayramovun sözlərinə görə, əməkhaqqı islahatı çərçivəsində yeni qaydalar 2026-cı il sentyabrın 1-dən tətbiq ediləcək. Dəyişikliklər ümumilikdə 72 212 tibb işçisini əhatə edəcək.
Onlardan 36 041 nəfər orta tibb heyətinin, 20 367 nəfər kiçik tibb heyətinin, 8 675 nəfər ambulator tibbi xidmət göstərən həkimlərin payına düşür. Daha 7 129 həkim isə ilkin səhiyyə və təcili tibbi yardım, anesteziologiya-reanimatologiya, eləcə də regionlarda kadr çatışmazlığı olan dar ixtisaslar üzrə fəaliyyət göstərir.
İslahat nəticəsində TƏBİB sistemi üzrə ilkin əməkhaqqı fondu 189 milyon manat və ya 13,66 faiz artırılacaq.
Yeni əməkhaqqı mexanizmi çərçivəsində artımlar bütün işçilər üçün eyni olmayacaq. Ödənişlərin məbləği vəzifə və ixtisas, iş yükü, fəaliyyət göstəriciləri, həmçinin regionlarda kadr təminatı nəzərə alınmaqla diferensial şəkildə müəyyənləşdiriləcək.