Azərbaycanda astronomik payız sentyabrın 23-də səhər saatlarında başlayacaq
Elpress.az xəbər verir ki, Azərbaycanda astronomik payız fəsli sentyabrın 23-də Bakı vaxtı ilə saat 04:05:08-də başlayacaq.Bu vaxt payız bərabərliyi baş verəcək. Həmin tarixdə gecə və gündüzün uzunluğu bir-birinə yaxın olacaq. Günəş şərqdə doğacaq, qərbdə isə batacaq. Bununla belə, atmosfer refraksiyası və Günəş diskinin ölçüsü səbəbindən gündüzün müddəti dəqiq 12 saat olmayacaq və gecədən bir qədər uzun davam edəcək.Payız bərabərliyi zamanı Günəşin illik görünən hərəkəti nəticəsində göy ekvatoru keçiləcək və Günəş Şimal yarımkürəsindən Cənub yarımkürəsinə doğru hərəkət edəcək. Bundan sonra Şimal yarımkürəsində gündüzlər qısalmağa, gecələr isə uzanmağa başlayacaq.Fəsillərin dəyişməsi Yerin Günəşə olan məsafəsinin dəyişməsi ilə deyil, planetin Günəş ətrafında hərəkəti və fırlanma oxunun orbit müstəvisinə təxminən 66,56 dərəcə meyilli olması ilə əlaqədardır. Bu xüsusiyyət il ərzində Günəş şüalarının Yer səthinə düşmə bucağının dəyişməsinə səbəb olur.2026-cı ildə astronomik payız 89 gün 21 saat 45 dəqiqə 1 saniyə davam edəcək. Fəsil dekabrın 22-də baş verəcək qış günəşduruşu ilə başa çatacaq və həmin andan Şimal yarımkürəsində astronomik qış başlayacaq.
