Hürmüz boğazı üzrə razılaşma və diplomatik təzyiqlər ABŞ-ın İrana zərbə planını dayandırdı
Elpress.az xəbər verir ki, ABŞ Prezidenti Donald Trampın İrana qarşı nəzərdə tutduğu hərbi müdaxiləni ləğv etməsinə mühüm diplomatik addımlar səbəb olub. Əsas amillərdən biri İranın xarici işlər naziri Abbas Əraqçinin Qətər və ABŞ-ın birgə hazırladığı kompromis təklifini qəbul etməsidir. Razılaşmaya əsasən, Hürmüz boğazı yenidən gəmilərin gediş-gəlişi üçün açılır: körfəzə daxil olan gəmilər İranın, çıxanlar isə Omanın ərazi sularından istifadə edəcək. Oman tərəfi bu şərtləri bəyənsə də, qərarın İran İnqilab Keşikçiləri Korpusu (SEPAH) tərəfindən də dəstəkləndiyinə dair rəsmi təsdiq tələb edib.Eyni zamanda, Səudiyyə Ərəbistanının vəliəhdi Məhəmməd bin Salman Donald Trampla telefonla danışaraq genişmiqyaslı hücumun region üçün yaradacağı təhlükələrdən narahatlığını çatdırıb. Qətər və Pakistanın daxil olduğu vasitəçi tərəflər də gərginliyi azaltmaq üçün ABŞ rəsmiləri və Trampın xüsusi nümayəndəsi Stiv Uitkoffla intensiv danışıqlar aparıblar.
