Rusiyanın Ukraynanın paytaxtı Kiyevə endirdiyi kütləvi hava hücumlarından sonra itkilərin sayı artmaqda davam edir. Rəsmilər axtarış-xilasetmə əməliyyatlarının hələ də davam etdiyini bildirirlər.
Elpress.az xəbər verir ki, Rusiyanın iyulun 2-nə keçən gecədən etibarən Ukraynanın paytaxtı Kiyevə endirdiyi intensiv hava zərbələri ağır itkilərə səbəb olub. Son məlumata görə, hücum nəticəsində həyatını itirənlərin sayı 20 nəfərə yüksəlib.Kiyev Şəhər Hərbi Administrasiyasının rəhbəri Timur Tkaçenkonun verdiyi məlumata əsasən, hücumlar zamanı paytaxtın Obolon, Qoloseyev, Şevçenko, Svyatoşin və Podil rayonlarında yaşayış binaları və mülki infrastruktur obyektləri ciddi zərər görüb. Dağıntılar altında insanların qala biləcəyi ehtimal olunduğundan ölən və yaralananların sayının daha da arta biləcəyi istisna edilmir.Mərhələli şəkildə açıqlanan rəsmi məlumatlarda əvvəlcə 2 nəfərin öldüyü, 16 nəfərin yaralandığı bildirilsə də, sonradan ölənlərin sayı əvvəlcə 8-ə, daha sonra 10-a, 11-ə, 13-ə, 17-yə və nəhayət 20-yə çatıb. Yaralananların sayı isə son məlumata görə 86 nəfərdir. Onlardan 70 nəfəri xəstəxanaya yerləşdirilib.Ukraynanın Fövqəladə Hallar üzrə Dövlət Xidməti və yerli hakimiyyət orqanları hadisə yerində axtarış-xilasetmə işlərinin davam etdiyini, dağıntılar altında qalan insanların xilas edilməsi üçün əməliyyatların fasiləsiz aparıldığını bildiriblər.
