“Rosselxoznadzor” İrandan Rusiyaya ixrac edilən çiçəklərlə bağlı fitosanitar sertifikatlaşdırmanın dayandırılmasını istəyib
Elpress.az xəbər verir ki , Rusiya Federal Baytarlıq və Fitosanitar Nəzarət Xidməti (“Rosselxoznadzor”) İrandan Rusiyaya ixrac edilən çiçəklərlə bağlı fitosanitar sertifikatlaşdırmanın müvəqqəti dayandırılmasını təklif edib.Qurumun yaydığı məlumata görə, 2026-cı ildə İrandan Rusiyaya idxal olunan çiçəklərin həcmi ötən ilin eyni dövrü ilə müqayisədə nəzərəçarpacaq dərəcədə artıb. Sənədlərdə məhsulların mənşə ölkəsi İran kimi göstərilsə də, onların görünüşü və qablaşdırılmasının əvvəllər Ermənistandan gətirilən çiçəklərlə eynilik təşkil etdiyi bildirilib.“Rosselxoznadzor” qeyd edib ki, 22 may 2026-cı il tarixindən Ermənistandan Rusiyaya çiçək idxalına müvəqqəti qadağa tətbiq olunub. Qurum hesab edir ki, mövcud vəziyyət Ermənistan mənşəli çiçəklərin İran ərazisi vasitəsilə Rusiyaya reeksport edilməsi ehtimalını yaradır.Bildirilib ki, məsələ ilə bağlı İranın Bitki Mühafizəsi Təşkilatına əvvəlcədən məlumat verilsə də, qarşı tərəfdən cavab alınmayıb. Bu səbəbdən “Rosselxoznadzor” ikitərəfli danışıqlar başa çatana və məsələyə tam aydınlıq gətirilənədək Rusiyaya ixrac ediləcək çiçəklərin fitosanitar sertifikatlaşdırılmasının dayandırılmasını xahiş edib.Qurum vurğulayıb ki, görülən tədbirlər Rusiyanın və Avrasiya İqtisadi İttifaqına üzv ölkələrin fitosanitar təhlükəsizliyinin qorunmasına xidmət edir.
