Ceyhun Bayramov: Bakı və Moskva ikitərəfli münasibətləri tam şəkildə normallaşdırmağa nail olub
Elpress.az xəbər verir ki , Azərbaycanın xarici işlər naziri Ceyhun Bayramov bildirib ki, Azərbaycan və Rusiya arasında bir müddət əvvəl yaranmış çətinliklər artıq geridə qalıb və ikitərəfli münasibətlər tam şəkildə normallaşıb.Nazir bu fikirləri Moskvada Rusiya xarici işlər naziri Sergey Lavrov ilə keçirdiyi birgə mətbuat konfransında səsləndirib. Onun sözlərinə görə, iki ölkə arasında münasibətlərdə yaşanan mürəkkəb dövr bugünkü danışıqlar zamanı da müzakirə olunub.Ceyhun Bayramov vurğulayıb ki, Azərbaycan və Rusiya həmin çətin mərhələni arxada qoyaraq əməkdaşlığın bütün istiqamətləri üzrə münasibətləri tam normallaşdırmağa nail olublar. O qeyd edib ki, bu nəticənin əldə olunmasında hər iki ölkənin rəhbərlərinin şəxsi siyasi iradəsi və səyləri mühüm rol oynayıb.Nazir əlavə edib ki, Azərbaycan və Rusiya uzun illərə söykənən tarixi, mədəni və humanitar əlaqələrə malik qonşu dövlətlərdir. Onun sözlərinə görə, xalqlar arasında formalaşmış sıx münasibətlər dövlətlərarası əməkdaşlığın möhkəm təməlini təşkil edir və gələcək əlaqələrin inkişafı üçün əlverişli zəmin yaradır.
