Elpress.az xəbər verir ki, Antalya mərkəzli logistika şirkətinə məxsus, təxminən 6 milyon avro dəyərində kakao daşıyan Türk TIR-ı İtaliyanın Bari şəhəri yaxınlığında silahlı şəxslərin hücumuna məruz qalıb
Hadisə sentyabrın 16-da saat 18:00 radələrində A-14 avtomagistralında baş verib. Maskalı və silahlı 4 nəfər avtomobillə TIR-ın qarşısını kəsərək atəş açıb. Daha sonra hücumçular rabitəni kəsmək üçün jammerdən istifadə edib, sürücünü avtomobildən düşürərək döyüb və TIR-ı qaçırıblar.Hadisə zamanı hücum edən şəxslərin atəş açması TIR-ın kamerasına da düşüb. Sürücü bir müddət sonra həyat yoldaşı ilə əlaqə saxlayaraq baş verənlər barədə məlumat verib.
İtaliya polisi TIR-ın yerini müəyyənləşdirərək avtomobili aşkar edib. Lakin hücumçular yük bölməsini aça bilmədikləri üçün TIR-ı içindəki yüklə birlikdə tərk edərək qaçıblar.Hazırda TIR və yük İtaliyadadır. Hadisə ilə bağlı araşdırma aparılır, 4 şübhəlinin saxlanılması istiqamətində tədbirlər görülür.
