Elpress.az xəbər verir ki, Fransa Hörmüz boğazında dəniz nəqliyyatının təhlükəsizliyini gücləndirmək məqsədilə bölgəyə əlavə hərbi texnika və qüvvələr yerləşdirib.
Fransa Prezidenti Emmanuel Macron bildirib ki, Yaxın Şərqə iki minaaxtaran gəmi, iki freqat və bir dəniz patrul təyyarəsi göndərilib. Onun sözlərinə görə, bu qüvvələr beynəlxalq tərəfdaşlarla koordinasiyalı şəkildə boğazda təhlükəsiz naviqasiyanın təmin olunmasına və dəniz daşımalarının normal rejimdə bərpasına dəstək verəcək.
Makron qeyd edib ki, bölgədəki son proseslər fonunda Fransanın hərbi qüvvələrinin yerləşdirilməsində də dəyişiklik edilib. Belə ki, Charles de Gaulle (R91) Tulon limanına qayıdır, digər hərbi vasitələr isə ehtiyac yarandığı halda əməliyyatlara cəlb olunmaq üçün Yaxın Şərqdə saxlanılır.
Fransa lideri, həmçinin ABŞ və İran arasında iyunun 17-də əldə olunmuş anlaşmanın regional sabitlik üçün mühüm addım olduğunu vurğulayıb və ölkəsinin təhlükəsizlik vəziyyətinə uyğun şəkildə hərbi fəaliyyətini davam etdirəcəyini bildirib.
