Ər-Riyad 10 mindən çox yüksəkdəqiqlikli aviabomba və tuşlama komplekti əldə edəcək
Elpress.az xəbər verir ki, ABŞ Dövlət Departamenti Səudiyyə Ərəbistanına təxminən 5 milyard dollar dəyərində yüksəkdəqiqlikli aviasiya sursatlarının və əlaqədar avadanlıqların mümkün satışını təsdiqləyib.Razılaşma çərçivəsində Ər-Riyadın 10 mindən çox aviabomba və eyni sayda “JDAM” tuşlama komplekti əldə etməsi nəzərdə tutulur. Paketə 500 funtluq 5004 bomba, 2000 funtluq 5 min bomba, həmçinin müvafiq KMU-572 və KMU-556 tuşlama sistemləri daxildir.Təchizatın əsas podratçısı kimi “Boeing” şirkəti çıxış edəcək. ABŞ tərəfi hesab edir ki, sözügedən silahların tədarükü Səudiyyə Ərəbistanının müdafiə imkanlarını artıracaq və ölkənin regional təhlükələrə qarşı mübarizə potensialını gücləndirəcək.Qeyd edək ki, bundan əvvəl ABŞ administrasiyası Qətər, İsrail, Birləşmiş Ərəb Əmirlikləri və Küveytə ümumilikdə 8,6 milyard dollardan artıq silah satışına da razılıq verib. Bu paketlər arasında ən böyük müqavilə Qətərlə bağlı olub. Təxminən 4 milyard dollarlıq satışa “Patriot” hava hücumundan müdafiə sistemləri üçün 500 PAC-2 və PAC-3 raketi, ehtiyat hissələri, texniki avadanlıqlar və xidmətlər daxil edilib.
