İldırımlı hava şəraiti səbəbindən iyulun 6-na planlaşdırılan bəzi Bakı–Naxçıvan aviareyslərinin icrası təxirə salınıb.
Elpress.az xəbər verir ki, bu barədə Azərbaycan Hava Yolları (AZAL) məlumat yayıb. Bildirilib ki, bölgədə hava şəraiti normallaşdıqdan sonra uçuşlar mərhələli şəkildə bərpa olunacaq və sərnişinlər mümkün dəyişikliklərlə bağlı əlavə məlumatlandırılacaqlar.
Şirkət qeyd edib ki, Naxçıvanın dağlıq relyefi və coğrafi mövqeyi səbəbindən bölgədə müşahidə olunan meteoroloji şərait uçuşların təhlükəsizliyinə birbaşa təsir göstərə bilir. Xüsusilə güclü külək, küləyin istiqamətinin qəfil dəyişməsi və ildırım aktivliyi eniş və qalxma mərhələlərində əlavə risk yaradır.
AZAL vurğulayıb ki, reyslərin təxirə salınması və ya ləğvi ilə bağlı qərarlar yalnız hava limanındakı mövcud hava şəraitinə əsasən verilmir.
Uçuş marşrutu boyunca, həm qalxma, həm də enmə məntəqələrində müşahidə olunan və proqnozlaşdırılan meteoroloji vəziyyət beynəlxalq aviasiya təhlükəsizliyi standartlarına uyğun şəkildə qiymətləndirilərək müvafiq qərar qəbul olunur.
