Bakıda fəaliyyət göstərən 6 saylı Uşaq Xəstəxanasının gələcəyi ilə bağlı yayılan məlumatlar müzakirələrə səbəb olub.
Elpress.az xəbər verir ki, əsas binada təmir işlərinin başa çatmasına baxmayaraq, tibb işçilərinin öz əvvəlki iş yerlərinə qayıda bilməyəcəyi ilə bağlı iddialar gündəmdədir.
Məlumata görə, son 4-5 ildə yararsız vəziyyətdə olan 6 saylı Uşaq Xəstəxanasının binasında müvəqqəti fəaliyyət göstərən həkimlər təmirdən sonra əvvəlki binalarına qayıdacaqlarını gözləyirdilər. Lakin təmir edilmiş binanın yeni yaradılacaq Pediatriya Mərkəzinə verilməsi ilə bağlı yayılan xəbərlər kollektiv arasında narahatlıq yaradıb.Məsələ ilə bağlı münasibət bildirən tibb elmləri doktoru Adil Qeybulla qeyd edib ki, belə dəyişikliklər zamanı ilk növbədə kollektiv rəsmi şəkildə məlumatlandırılmalı, əməkdaşların taleyi nəzərə alınmalıdır.
TƏBİB-dən verilən açıqlamada isə bildirilib ki, səhiyyə xidmətlərinin optimallaşdırılması çərçivəsində müxtəlif variantlar nəzərdən keçirilir.
Qurum vurğulayıb ki, hazırda mərkəzin yerləşdirilməsi ilə bağlı yekun qərar qəbul edilməyib.Həmçinin qeyd olunub ki, gələcəkdə hər hansı qərar veriləcəyi təqdirdə, əməkdaşların peşə fəaliyyətini fasiləsiz davam etdirməsi üçün zəruri iş şəraiti yaradılacaq.
