Mayın 20-də Azərbaycan Respublikasının maliyyə naziri Sahil Babayev ölkəmizdə səfərdə olan Dünya Bankının Cənubi Qafqaz üzrə regional direktoru xanım Roland Prays ilə görüş keçirib.
Elpress.az-ın Azərtac.az-a istinadən verdiyi məlumata əsasən, Azərbaycan ilə Dünya Bankı arasında əməkdaşlığın mövcud vəziyyəti, enerji və nəqliyyat sahələrində icra olunan birgə layihələr, eləcə də gələcək prioritet istiqamətlər görüş zamanı müzakirə edilib. Eyni zamanda Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində dayanıqlı şəhər inkişafı və infrastruktur sahələrində əməkdaşlığın genişləndirilməsi imkanları barədə fikir mübadiləsi aparılıb.Məlumata görə, nazir Sahil Babayev Dünya Bankı ilə əməkdaşlığın Azərbaycanın sosial-iqtisadi inkişafına mühüm töhfə verdiyini qeyd edərək, tərəfdaşlığın enerji keçidi, nəqliyyat əlaqələrinin gücləndirilməsi, infrastrukturun modernləşdirilməsi, sosial müdafiə, məşğulluq və institusional islahatlar istiqamətlərində uğurla davam etdiyini bildirib. O, enerji sektoru üzrə əməkdaşlığın əhəmiyyətini vurğulayaraq “AZURE” layihəsinin Azərbaycanın yaşıl enerji strategiyasında xüsusi rol oynadığını diqqətə çatdırıb. Bildirilib ki, layihə çərçivəsində bərpaolunan enerji mənbələrinin elektrik ötürücü şəbəkəyə inteqrasiyası və infrastrukturun genişləndirilməsi istiqamətində işlər davam etdirilir.Qeyd olunub ki, Dünya Bankının dəstəyi ilə həyata keçirilən “Regional bağlantı və inkişaf” layihəsi çərçivəsində Salyan–Biləsuvar yol dəhlizinin yenidən qurulmasının başa çatdırılması regional bağlantıların gücləndirilməsi və logistika imkanlarının yaxşılaşdırılması baxımından mühüm əhəmiyyət daşıyır. Həmçinin M3 magistral avtomobil yolunun Biləsuvar–Astara hissəsinin bərpası üzrə mümkün maliyyələşmə məsələləri müzakirə olunub və regional nəqliyyat dəhlizlərinin iqtisadi inteqrasiyada roluna diqqət çəkilib.Öz növbəsində Dünya Bankının Cənubi Qafqaz üzrə regional direktoru xanım R.Prays Azərbaycan ilə əməkdaşlığın inkişafından məmnunluğunu ifadə edərək, enerji infrastrukturu, iqlim dayanıqlığı, yaşıl inkişaf, sosial müdafiə, məşğulluq və insan kapitalının gücləndirilməsi istiqamətlərində əlaqələrin genişləndirilməsində maraqlı olduqlarını bildirib. O, həmçinin WUF13-də iştirakın dayanıqlı şəhərsalma və infrastruktur sahələrində tərəfdaşlığın inkişafı baxımından önəmli olduğunu vurğulayıb.Sonda tərəflər Azərbaycan ilə Dünya Bankı arasında dialoqun və əməkdaşlığın gələcəkdə də davam etdirilməsinin vacibliyini qeyd ediblər.
