Dövlət idarəçiliyində yeni dəyişikliklər: bir sıra publik hüquqi şəxslər büdcə təşkilatına çevrildi, bəzi qurumların fəaliyyəti yenidən təşkil olundu
Azərbaycanda dövlət adından yaradılmış bir sıra publik hüquqi şəxslərin fəaliyyətinin yenidən təşkili ilə bağlı mühüm qərarlar qəbul edilib.Azərbaycan Respublikasının Prezidenti İlham Əliyev dövlət qurumlarının fəaliyyətinin daha səmərəli təşkili məqsədilə bir sıra publik hüquqi şəxslərin statusunun dəyişdirilməsi və yenidən strukturlaşdırılması ilə bağlı fərman imzalayıb.Fərmana əsasən, Dövlət Ehtiyatları Agentliyi, Mədəniyyət Nazirliyinin tabeliyində fəaliyyət göstərən Kino Agentliyi, Kənd Təsərrüfatı Nazirliyinin tabeliyində Balıqçılıq və Akvakultura Mərkəzi, Azərbaycan Elm Fondu, Minatəmizləmə Agentliyi, Azərbaycan Dövlət İnformasiya Agentliyi (AZƏRTAC), Hüquqi Ekspertiza və Qanunvericilik Təşəbbüsləri Mərkəzi və onun tabeliyində olan Hüquq və İnsan Haqları İnstitutu publik hüquqi şəxs statusundan çıxarılaraq büdcə təşkilatı statusuna keçirilib.Sənədə əsasən, həmçinin işğaldan azad edilmiş ərazilərdə fəaliyyət göstərən bir sıra Bərpa, Tikinti və İdarəetmə xidmətlərinin hüquqi formasının dəyişdirilməsi nəzərdə tutulub. İqtisadiyyat Nazirliyinə həmin qurumların MMC-lərə çevrilməsi, dövlət qeydiyyatının həyata keçirilməsi və fəaliyyətlərinin yeni hüquqi statusa uyğun təşkili ilə bağlı zəruri tədbirlərin görülməsi tapşırılıb.Bundan əlavə, Nazirlər Kabinetinə “Maqsud İbrahimbəyov Yaradıcılıq Mərkəzi” və Marionet Teatrının əsasında Mədəniyyət Nazirliyinin tabeliyində büdcə təşkilatlarının yaradılmasını təmin etmək, eləcə də Şuşa şəhəri və rayonu ərazisində idarəetmə və kommunal xidmətlərin təşkili məqsədilə yeni qurumların yaradılması ilə bağlı tədbirlər görmək tapşırılıb.Fərmanla yaradılan yeni qurumların maliyyələşdirilməsi, onların strukturunun, ştat vahidlərinin və əməkhaqqı sistemlərinin optimallaşdırılması istiqamətində də müvafiq addımların atılması nəzərdə tutulur.
