“AzerGold” QSC müqəddəs Qurban bayramı münasibətilə növbəti genişmiqyaslı sosial yardım aksiyasını həyata keçirib. Şirkətin fəaliyyət göstərdiyi əraziləri əhatə edən təşəbbüs çərçivəsində Daşkəsən və Göygöl rayonlarında, həmçinin Naxçıvan Muxtar Respublikasında yaşayan təxminən 500 ailəyə bayram sovqatları çatdırılıb.
Elpress.az-ın Apa.az-a istinadən verdiyi məlumata əsasən, sosial yardım kampaniyası Naxçıvan Muxtar Respublikasının Culfa rayonunu, Göygöl rayonunun Tülallar və Zurnabad kəndlərini, eləcə də Daşkəsən rayonunda yaşayan Birinci və İkinci Qarabağ müharibəsi şəhidlərinin ailələrini, müharibə iştirakçılarını və sosial dəstəyə ehtiyacı olan ailələri əhatə edib.Qurban bayramı ərəfəsində Cəmiyyətin nümayəndələri yerli icra hakimiyyəti orqanlarının təmsilçiləri ilə birlikdə ailələrə baş çəkib, “AzerGold” QSC kollektivi adından səmimi bayram təbriklərini çatdırıb, müxtəlif növ zəruri ərzaq məhsullarından ibarət sovqatlar və qurban paylarını təqdim ediblər.Qeyd edək ki, “AzerGold” QSC tərəfindən mütəmadi olaraq müxtəlif sosialyönümlü layihələr, humanitar aksiyalar və icma dəstəyi proqramları icra olunur. Bu təşəbbüslər regionlarda yaşayan əhalinin sosial rifahının yüksəldilməsinə və ictimai həmrəyliyin gücləndirilməsinə xidmət edir.
