Şamaxıda COP31 Sədrliyinin təşkilatçılığı ilə iqlim danışıqları üzrə dövlət nümayəndə heyətlərinin rəhbərlərinin üçüncü qeyri-rəsmi Şamaxı Toplantısı baş tutub.
Elpress.az xəbər verir ki, Azərbaycan Xarici İşlər Nazirliyinin yaydığı məlumata əsasən, tədbirdə 34 ölkədən və BMT-nin İqlim Dəyişmələri üzrə Çərçivə Konvensiyasının (UNFCCC) Katibliyindən 70-dən çox nümayəndə iştirak edib. Toplantıda nazirlər, nazir müavinləri, dövlət başçılarının iqlim məsələləri üzrə nümayəndələri, eləcə də UNFCCC-nin danışıqlar qruplarının rəhbərləri təmsil olunublar.
Müzakirələrdə iqlim maliyyəsi, ədalətli keçid, iqlim dəyişikliklərinə uyğunlaşma, istixana qazı emissiyalarının azaldılması, həmçinin COP29, COP30 və COP31 sədrliklərinin Troika çərçivəsində həyata keçirdiyi “Belem 1.5 Missiyası” təşəbbüsü əsas gündəm mövzuları olub.Toplantıda cari ilin iyun ayında Almaniyanın Bonn şəhərində keçirilmiş UNFCCC Köməkçi Orqanlarının 64-cü sessiyasının nəticələri, qarşıdan gələn COP31 çərçivəsində qəbul ediləcək qərarların hazırlanması və iqlim danışıqlarında mövcud çətinliklərin aradan qaldırılması yolları ətrafında fikir mübadiləsi aparılıb.Açılış və bağlanış mərasimlərində Azərbaycan xarici işlər nazirinin müavini və COP29-un baş danışıqçısı Yalçın Rəfiyev, COP31-in baş icraçı direktoru, Türkiyənin ətraf mühit, şəhərsalma və iqlim dəyişiklikləri nazirinin müavini Fatma Varank, COP31 üzrə məsləhətçi Salli Boks, Azərbaycan Prezidentinin iqlim məsələləri üzrə nümayəndəsi Muxtar Babayev və Braziliyanın Ətraf Mühit və İqlim Dəyişiklikləri Nazirliyinin Milli Katibi Ana Tonin çıxış ediblər.
Bildirilib ki, Şamaxı Toplantısı iqlim danışıqları iştirakçıları arasında açıq, şəffaf və nəticəyönümlü müzakirələrin aparılması üçün mühüm platformaya çevrilib. Tədbir iştirakçıları bu formatın gələcəkdə də davam etdirilməsini dəstəklədiklərini ifadə ediblər.
Qeyd olunub ki, COP32-yə ev sahibliyi edəcək Efiopiya nümayəndə heyəti 2027-ci ildə Azərbaycanla birlikdə dördüncü Şamaxı Toplantısını keçirməyə hazır olduqlarını bəyan edib.
